Mae Coleg Gŵyr Abertawe (GCS) yn un o’r colegau sy’n perfformio orau yn y DU. Rydym yn enwog am ein rhaglen Lefel A, gyda chanlyniadau rhagorol a chyfraddau symud ymlaen i brifysgolion gorau’r DU. Mae gan GCS hanes hir, yn dyddio'n ôl i 1825.
Rydym wedi bod yn dysgu Lefel A ers 1951 ac yn awr yn addysgu dros 40 o bynciau gwahanol. Mae maint ein dosbarthiadau yn fach gyda chyfartaledd o 15 o fyfyrwyr ym mhob dosbarth, a addysgir gan athrawon cymwys iawn, llawer ohonynt yn brif arholwyr yn eu pwnc.
Sefydlwyd ein Rhaglen Baratoi Rhydgrawnt ym 1987, ac mae tua 10 o fyfyrwyr yn symud ymlaen i Gaergrawnt bob blwyddyn o’r Coleg. Rydym hefyd yn cynnig Rhaglen Tiwtorial Meddygol sy'n paratoi myfyrwyr ar gyfer mynediad i Ysgolion Meddygol gorau'r DU.
Mae Academi Saesneg GCS yn cynnig ystod o raglenni gan gynnwys y Cwrs Paratoi IELTS a Safon Uwch, Saesneg Academaidd, Saesneg Cyffredinol a'r Rhaglen Sylfaen Ryngwladol.
Mae ein myfyrwyr rhyngwladol yn elwa o system diwtorial, cymorth sgiliau astudio a rhaglen gymdeithasol ryngwladol gyffrous, sy'n galluogi myfyrwyr i ffynnu a gwireddu eu llawn botensial.
Mae Coleg Gŵyr wedi’i leoli mewn ardal o harddwch naturiol eithriadol, wedi’i amgylchynu gan draethau hardd a chefn gwlad. Abertawe yw ail ddinas fwyaf Cymru, dim ond 3 awr ar y ffordd/trên o Lundain. Mae’n ddinas fywiog, gyfeillgar gydag amrywiaeth wych o siopau, caffis a sinemâu, a digonedd o weithgareddau diwylliannol ar gael.
Rydym yn falch o fod yn Goleg Rhyngwladol, ac wedi bod yn croesawu myfyrwyr o Tsieina a gwledydd eraill i Abertawe ers blynyddoedd lawer. Gobeithiwn y bydd Dosbarth Gŵyr yn rhoi cipolwg i chi ar fywyd fel myfyriwr yng Ngholeg Gŵyr Abertawe, ac edrychwn ymlaen at eich croesawu yma yn y dyfodol.
